Bragi Ásgeirsson (1931)

Eftir að Bragi lauk námi við Handíðaskólann í Reykjavík árið 1950 fór hann til Kaupmannahafnar í frekara nám. Hann nam við Listaháskólann í Kaupmannahöfn frá 1950-1952 og var í Ósló frá 1952-1953. Þar stundaði hann nám við Listaháskólann og lærði grafík við Listiðnaðarskólann.  Árið 1953-1954 dvaldist hann í Róm og Flórens, fór svo aftur til Kaupmannahafnar veturinn 1955-1956 þar sem hann lærði grafík við Listaháskólann. Frá 1958-1960 var Bragi við Listaháskólann í München og ferðaðist víða um lönd Vestur-Evrópu, Júgóslavíu, Austur-Þýskaland, Rússland, Ameríku og Kanada. Bragi kenndi lengi við Myndlista- og handíðaskóla Íslands, eða í fjörutíu ár, frá 1956-1996.
Bragi hefur haldið merkjum grafíklistarinnar á lofti hér á landi síðustu áratugina auk þess að hafa haldið fasta pistla um myndlist og sjónmenntir í Morgunblaðinu og verið gagnrýnandi blaðsins frá 1966. Bragi er einnig mikilvirkur málari og hefur bæði málað hlutbundin málverk í poppstíl og abstrakt málverk sem á síðustu árum hafa einkennst af mikilli efniskennd og ljóðrænni mýkt í formi og litum. Þessi áhugi Braga, bæði á fígúratífu myndmáli og abstrakt formum, má greinilega sjá í vinnu hans með grafíkina þar sem kröftug formmótun og myndbygging er gerð með hugsunarhætti abstraktsins þó að myndin sýni atburð eða manneskju, það er, sé að upplagi fígúratíf mynd. Bragi hefur stundað grafíkina í tímabilum og eftir langt hlé hóf hann aftur að þrykkja árið 1983, hann hefur þrykkt myndir við ljóð íslenskra skálda og endurunnið viss þemu sem hafa ávallt verið honum hugleikin og ber þá helst að nefna konuna, sem kemur fram í ýmsum myndum í verkum hans.